*** චිත්‍ර විකුණන මහලු උන්දා මගේ මුළු යටි හිතම බින්ඳා! ***

පොඩි එකා 

ඇකයේ තියන් 

සිතුවම් එකින් එක

ගොඩ ගසා

.

හිතට නැගෙනා 

කඳුල තම කුස

ගින්නෙ පදමට

ගෙන අනා
.
හීන කලවම් 

කරපු සිත්තම්

පෙළින් පෙළ

එක එක තබා.

.

කලා බවනෙක 

ඉදිරිපිට හිඳ

හෙළයි සුසුමන්

සිත්තරා..

.

කලාතුරකින් 

ළගින් යන එන

පෙම්වතෙක්

පෙම්වති නිසා

.

මිලගණන්

අසමින් සිනාසෙයි

පෙම්වතිය

සනසනු නියා

.

ඉදිරි පිට ඇති 

ජෝන් සිල්වගෙ

නිහඬ ගල්

පිළිමය විනා

.

සිහින හඳුනන

කිසිවෙකුත් නැත

නිතර මෙතැනින්

යන එනා..

*****************************

සිහින ටික කැන්වසක අන්ඳා

දුක ඉරා ඉන් වැටට රන්දා

චිත්‍ර විකුණන මහලු උන්දා

මගේ මුළු යටි හිතම බින්ඳා!

--කුරුළු--

* පින්තුරෙ - අන්තර්ජාලයෙනි