== තකදොං කවියො ඉන්නවා ===

මචං මගේ ෆස්ට් ලවු එක
නැති වුන දුක කියාගන්න
පුළුවන් නං තරහ නැතිව
කවියක් මට ලියල දෙන්න..
.
අනේ අයියෙ එයා මගේ
අතර මගදි දාල ගියා
එයාට මගෙ දුක කියන්න
පද හතරක් ලියල දෙන්න

.
බැඳපු කෙනා ඉන්නෙ රටයි
මමයි පුතයි කන්නෙ කටයි
අපෙ මේ දුක කියාගන්න
කවියක් මට ලියල දෙන්න

.
අනේ යාලු කෙල්ල මගේ
සල්ලි හොයං පැනල ගියේ
අද වගේම අවුරුද්දේ
හීතල වැහි දවසකනේ

.
වෙනදට වැඩියෙන් එයාගෙ
උනුහුම වැහි දාට අගේ
පුලුවන් වෙයි නේද මගේ
දුක ලියන්න හිතෙන් නුඹේ

.
දැන් ඉස්සර වගේ නෙවෙයි
අපි දෙන්නා ඩිවොස් වෙලා
නිවාඩුවට මං ආවම
ඉමුද අපිත් තුරුල් වෙලා

.
අනේ පුතේ අපේ දුවට
ඉස්කෝලේ තරගයකට
පෙන්නන්ට කවි දෙනවද
නිකං නෙවෙයි සල්ලි වලට

.
අනේ කුරුළු අපෙ අම්මා
ඊයේ රෑ මැරිල ගියා
එ් දුක ගැන ලියපු සිරා
කවියක් මට දියං බබා

.
සුදු අයියේ මගෙ කතාව
හෙමි හෙමීට මං දෙන්නං
කවියෙන් ඒ ගැන ලිවුවොත්
මගේ හිතම මං දෙන්නං

.
හරි නරකයි අපෙ බූලා
ඊයෙත් ගිරවෙක් හපලා
ඒ සිද්ධිය රහ කරලා 
කවියෙන් කියමුද ගොතලා

.
මේ ඔයාට බැරිද ඉතින්
මං ගැන කවි ලියල දෙන්න
ඒ වෙනුවට උම්ම ගොඩක්
දෙන්නං කම්මුල පිරෙන්න

.
අය වැය ගැන - කැම්පස් ගැන
සවුදියෙ ගල් ගහනෙක ගැන
දුක් විදිනා සේවක නඩ
ගැන නොලියන උඹ මොකටද

.
අහ් එහෙනං උඹට බැරිද
තියාගනින් උඹෙ ගණකං
හරි අපි වෙන එකෙක් හොයං
අපෙ කවි ටික ලියවන්නං

.
දන්නවාද ඕන තරං 
පට්ට කවියො ගෝනි ගනං
සත ගාණට යන්නෙ මචං
උඹට ඉන්න වෙන්නෙ බලං

.
අනේ ඔයා හරිම ෂෝක්
ලියන ඒව ඊට ෂෝක්
හම්බුනාම සෙල්ෆියකුත් - ගහමු කියනවා

.
අදත් හෙටත් හැම තැනකම
ඕන දෙයක් ලියාගන්න 
මොනව වුනත් කෙලින් ඉන්න - කවියො ඉන්නවා 

.
දුක කියන්න දුක ලියන්න
තනි වුනාම හිස තියන්න
සැප විදින්න උරහිස දෙන - කවියො ඉන්නවා 
යාලු කවියො ඉන්නවා
------------------------------
--කුරුළු---